හිමාල කඳු මුදුනේ “Qomolangma හුණුගල්” ලෙස හඳුන්වන අවසාදිත පාෂාණ හුණුගල් ඇත. එය තුළ වසර මිලියන 488.3-443.7 කට පෙර Ordovician යුගයේ පොසිලගත සාගර ජීවීන් ගණනාවක් ඇත. එවැනි පොසිල හිමාලය හරහා හමු වන අතර, එම සොයා ගැනීම් අතර ට්‍රයිලොබයිට්, බ්‍රැකියෝපොඩ්, ඔස්ට්‍රකෝඩ් සහ ක්‍රිනොයිඩ් ඇතුළත් වේ.
අවසාදිත පාෂාණ සියල්ලම පාහේ සෑදී ඇත්තේ ජල ඛාදනයෙනි, වසර දහස් ගණනක් හෝ මිලියන ගණනක් පුරා පාෂාණ අධික පීඩනය යටතේ අවසාදිත පාෂාණ බවට පත් වේ. පැරණි සාගර ජීවීන් ඉහළ කඳු මුදුන් වල සිටීම අපට පවසන්නේ එවරස්ට් කඳු මුදුනේ ඇති පාෂාණ කලක් සාගරය යට තිබූ බවයි. එම පර්වතය මුහුදු මට්ටමේ සිට මීටර් 8,000 (අඩි 26,200)කට වඩා ඉහළට ගෙන ඒමට යම් භූ විද්‍යාත්මක සිද්ධියක් හේතු වී ඇත.
ඇත්ත වශයෙන්ම පිළිතුර වන්නේ භූ තැටි විද්‍යාවයි. එවරස්ට් සහ හිමාලය සෑදී ඇත්තේ වසර මිලියන 40-50 කට පමණ පෙර ආරම්භ වූ යුරේසියානු සහ ඉන්දියානු මහාද්වීපික තැටි අතර ගැටුමකිනි.
එසේ නමුත් ලොව පුරා පැතිර ගිය මහා ගංවතුරක්/සුනාමියක් නිසා මෙලෙස ජලජ ජීවින් ඉහළට ගිය බව පිළිබඳ අසත්‍ය තොරතුරක් ෆේස්බුක් හි සංසරණය වී ඇත. කෙසෙ නමුත් ඉහළින් සඳහන් කල කාරණා දැනට විද්‍යාඥයින් විසින් සොයාගෙන ඇත. ඒ අයුරින් හිමාලය කඳු වැටිය අතීතයේ මුහුදු පත්ලේ පැවති බව ඔප්පු වේ.
